Volume 22, 2023 (CEBC-INDY) February 05, 2023
CEBC-Indy Hi Zeidah a Kan Funtomtu a Si?
Chinmi ramthumnak kan hun phanh cio hnu i khrihfabu kan dirning le kan hruaining le kan kalpimi hi nan ruah tuk ciomi a si lai tiah ka ruat. Kei zong ka ruat peng. Nihin pastor ka tuannak kum 5 a luh cuahmah bu zong ah ka ruat cuahmah rih ko.
Zeiruangdah CEBC-Indy ah na um tiah in hal tuah usih law zeidah na bialehnak a si hnga? Cun, kan tlaangtaar bantukin zeidah kan khrihfabu hi a kan funtomtu a si tiah in hal usih law teh? Zeiruangdah cu biahalnak cu ka tuah? Chinmi khrihfabu kan dir tik ah kan min sakmi kong hi tampi ruah ding a um rua ka ti. Kan khrihfabu min hmai/lai/dongh i kan chiahmi te hi na ruat hna maw? “Chin” “Falam” “Zophei” “Lautu” “Senthang” “Mi-e” tibantuk kan chiah lulhmi khi ka hnaak a ka do ngaingai. Tahchunhnak ah, Laitlang lei ahcun Thantlang Baptist Church an ti tik ah Thantlang khua i a ummi a sinak hmunhma “location” caah an hman duhmi a si rua tiah ka ruah. Hakha Baptist Church an ti ah, Falam Baptist Church an ti ah khi khua min an chiahmi khi a umnak khua chirhchanh in an sakmi a si rua tiah ka ruah.
Sinain, a tu cu Indianapolis, Indiana, USA ah kan um nain a cung i ka tialmi min pawl kan isak tik hna ah Laitlang lei bantuk “hmunhma” hoih in cun kan hmanning a si rua lo tiah ka ruat. Hi min pawl hi a kan funtomtu bantuk, kan sinak “identity” bantuk hoih deuh in kan isakmi a si ko lo hme maw ka ti. A chung ummi chungtel hna zong kan izoh tik ah cu kan khrihfabu min nih a huapmi minung deuh kan si hna. A sual tuk maw ti ahcun a sual tuk lai ka zum lo (faak tuk in kan dirpi i cu kan min nih a huap khawhlomi minung kan donh hna tu ahcun sual tuk hme teh, vun rang nih vun nak an rak donh hna bantukin).
Khah, khrihfabu hi kan sining a kan huaptu min nih a kan funtom a si sual ahcun Cathiang cawnpiakmi kan nganh deuh tiah ka ruah pin ah, cu min nih a ka huap in a ka aiawh rua lo tiah ai ruatmi hna caah zeitindah a ruah ve hnga? Siloah, hi tining tein kan kal ko ahcun caan sau a nguh te lai maw? A kan funtomtu hi a cung ka tialmi “min” hna ruang an si sual ahcun zeidah kan lawh te hnga? Khrihfabu chungtel a kan funtomtu ding cu teh an si rengreng maw?
Khrihfabu tuanbia kan zoh tik ah teh, zeidah a rak funtomtu hna a si? Miphun aiawh huaptu min nih a rak funtom sawhsawh hna lo ti cu a fiang tuk. Minung cu mah le miphun khat chim lo u le nau le nu le pa taktak hmanh irem lo khawh ngai a si ti kan theih dih.
Cucaah, CEBC-Indy a kan funtomtu hi zeidah a si setset ti rak ruat ve tuah. Zeiruangdah hi khrihfabu ah na luh le na um ti zong rak ihal than tuah. Kei nih cun, hi khrihfabu hi Khrih le a biatak nih a kan funtom awk a si tiah ka ruah. Cucu a si awk zong a si ka ti. CEBC-Indy nih kan kheng maw? Biatak nih funtommi kan si maw? Khrih le a bia, biatak nih funtommi le hruaimi kan si maw? Khrih le biatak nih funtommi kan si lo sual ahcun hi vawlei cung lila zong ah Khrih le biatak nih a kan tthen te lai pin ah zungzal in a kan tthen te fawn lai.
PDF Download: