Pathian Bia le Zumtu Nunnak

June 7th, 2026

Pastor Za He Lian

Laimi zong Pathian zaangfahnak thawngin zumtu kan sinak kum 120 lengpi a si ve cang.

Pathian le kan nunphung ṭhen awk a har caah biaknak le nunphung hi ti le nga bantuk in

hmunkhat ah a kal ṭi lengmang. Laitlang in, Kawlram: Kalay, Mandalay, Yangon, Shan state,

Malaysia, U.S., le ram thumnak hna kan phak hnu zong ah Pathian a tlaihchan pengmi miphun

kan si. Kan phaknak kip ah mah le si khawh tawk cio in pumhnak hmang in Pathian a

thangṭhatmi kan si. Pathian nih thimmi miphun ti zong ah aa timi kan si.

Lunglawmhnak kan ton caan zong ah siseh, ngaihchiatnak kan ton caan zong ah siseh,

Pathian min in kan i lawmhpi i kan i ngaihchiatpi. Zei kan tuah paoh ah Pathian sawm lo cun

a siarem lomi miphun kan si. Nauthar thlacam, chuahcam (birthday) thlacam, innthar luh

thlacam, fale hna nih teinak an hmuh caan zong ah Pathian min tein thlacamnak tuah le thil

dangdang zong Pathian min in thlacamnak he a cawlcang lengmang mi kan si.

Pathian le Laimi kan nunning cu ṭhen awk ṭha lo in a kal ṭimi a lo nain Pathian nih a kan pekmi

a Bia he cun kan i hlat ngaingai. Laimi zumtu hi Pathian Bia chung ah lut lem loin a

pawngkam hrawng ah aa hel sawhsawh mi lawng te kan si. Kan zumhmi Pathian nih a kan

pekmi a Bia hmang in kan ruahnak zong kan sersiam duh lo lengah cu Pathian Bia lila cu

kanmah nih thlen kan timh i kan nunphung chung ah khumh in tlumter kan timh.

Zumtu pakhat dirhmun in Pathian Bia kan hmuh ning a diklo ahcun kum sau pi zong zumtu

kan si lai nain kan nunnak ah thei kan tlai kho lai lo. Pathian Bia hmang in kan nun aa thlen in

Pathian Bia hmang in zumhnak ah ṭhan ding kan si.

Tuchan Laimi zumtu tam deuh cu Pathian cu kan zumh nain Pathian Bia cu kan zum lem lo

mi hna a lo. Vawlei kan nun chung ah pasal he pehtlaihnak ah siseh, nupile pehtlaihnak ah

1

siseh, nulepa le fale pehtlaihnak zong ah siseh, zumtu hna he pehtlaihnak zong ah ṭhan le

thlen a haumi lawng te kan si. Pasal caah a tlingmi kan um lo i nupi ca zong ah a tlingmi kan

um lo i fale ca zong ah soi awk um loin a tlingmi kan um lo i zumtu hawi hna ca zong ah a

tling khitkhat mi hohmanh kan um lo. Nitin tein Pathian Bia hmang in thlen le ṭhan a herh

peng mi kan si nain aa thleng kho ti lomi bantuk in kanmah le kanmah kan i hmu. Pathian

Bia a ṭhawnzia hi kan zumh lo caah a si.

Nulepa lila zong Pathian lei kar kan hlannak ah tharchuah a hau peng mi kan si. Thlarau lei

karhlannak ah ka tling cang, ka phak cang ti a um kho lo. Cawn peng, thlen peng, ṭhan a hau

peng mi kan si. Cu vialte hna cu Pathian nih a kan pekmi a Bia hmang lawnglawng in a tling

khomi an si— vawlei fimnak le thiamnak nih a chuahter khawhmi a si lo.

Pathian Bia hi ka zum taktak maw? Pathian Bia nih a kan thlen khawh, a ka sersiam khawh, a

kan remh khawh tihi pumpak ka nun ah ka zum taktak maw? Pathian le a Bia cu hmunkhat te

ah aa rual tein a kal ṭi zungzalmi a si. Pathian cu a Bia ning tein rian a ṭuan pengmi a si.

Pathian zong zumh a hau i a kan pekmi a Bia (Baibal ca) zong zumh a hau. Cu a Bia hmangin

thlarau nun ṭhan zong i timh ding a si i thlarau lei zong ah karhlan ding a si. Cu a Bia hmang

in Khrihfabu zong kan kal ding a si i kan nunphung zong kan sersiam ding a si. Cu a Bia lila

nih a kan chimhmi cu van le vawlei hi rawk hmanh sehlaw ka Bia cu a rawk lai lo a ti (Matt

24:35).

Pathian cu zum ko hmanh u sih law a kan pek mi a Bia kan zumh lo ahcun thlarau lei ah a ṭhan

zong kan ṭhang kho lai lo i a kan khamhtu Jesuh Khrih lei zong ah kar kan hlang kho taktak lai

lo. Cucaah, Pathian zong zumh in i bochan, a kan pek mi a Bia zong hi zumh in i bochan ding

hi kan nunnak ah a biapi taktakmi a si. Pathian lawng zumh in a Bia a zumlo mi si hram hlah u

sih.