ZUMTU NAWLNGEIHNAK (Believer’s Authority)

August 9th, 2026

Rev. Dr. Thawngling Mualhlun

Voikhat cu police nih na mawtaw rang tukin na mawngh a ti i a ka tlaih. Dan a ka tat. Ka zoh

ah mi hmete a si, a holh a hak pah fawn. Kut tum in zuan hnawh ahcun a zam ding phun khi a

si. Asinain police a si caah ka let ngam lo, a bia tu ka ngaih. Zeicahtiah, police cu cozah nih

nawlpekmi an si. Anmah pumrua le sining ah si loin an nawlngeihnak ah khan a si. Cu

nawlngeihnak cu cunglei in a ra mi, ram uktu nawlngeihnak sang bik sin in a ra mi a si caah an

nawl ngeih a hau.

Cu bantuk cu zumtu nawlngeihnak zong a si ve. Nangmah le keimah cu zeihmanh kan si lo nain

van le vawlei nawlngeihnak a ngeitu Bawipa Jesuh Khrih nih a nawlngeihnak hrawmmi kan si

ve.

Nawlngeihnak hi Grik holh ah cun ‘exousia’ ‘exesti’ timi in a rami a si i, a dik, nawl suai ning in tikhi a si. Cucaah nawlngeihnak timi cu a dikmi, nawl suai ning in hmanmi khi a si. Cu nawl vialte cu kan Bawipa Jesuh hi pek a si i, amah nih a kan hrawmhmi, a kan pek chin ve mi kan si.

Cucaah thil tampi lak ah a tanglei panga hi zumtu nawlngeihnak ah a muru, Pahtian bia nih a

kan cawnpiakmi kan cheuh ve hna.

1st: ZUMTU CU PATHIAN FA KAN SI. Amen. “Asi nain tlawmpal nih cun an rak cohlan i an

rak zumh i cu hna cu Pathian fa cannak nawl kha a pek hna” (Jn 1:12). Fa kan sinak kha philh

hlah. Zingfa, zanfa in Pathian fa kan sinak kha fiang zungzal ko usih.

2nd: NIHIN HI BAWIPA PEKMI NI A SI. Kan thawhka in Pathian pekmi ni sunglawi caah

thangṭhatnak kan chim lai. Bawipa, ni sunglawi na ka pek caah ka lawmtuk tiah voi tampi kan

au lai. Salm 118:24: BAWIPA nih a kan pekmi ni hi zeitluk in dah a ṭhat, hi ni ahhin i lawm u

sih law i nuam u sih.

3rd: BAWIPA PEKMI NI CU PATHIAN RALTHUAM TLING HE KAN HMAN LAI. Kan

ralpa cu Pathian ralthuam tling he kan fuh ve lai, kan chuahhnawh ve lai: Taisawm caah

BIATAK, ṭangphaw caah DINNAK, phaw caah ZUMHNAK, kedan caah DAIHNAK

THAWNGṬHA, luchin caah KHAMHNAK, vainam caah PATHIAN BIA (Efesa 6:10-18) an si

lai. Hi vialte hi nawlngeihnak thlacamnak (Jeim 5:16) in kan cawlcanghter lai. Bawipa pekmi

ni chun nitlak kan hmannak ah Pathian ralthuam tling ai hrukmi kan si kha philh hlah.

4th: NAWLNGEIHNAK HRAWMHMI KAN SI. Amen. “Ngai hmanh u! Rul le tlangngaikuang

lamh khawhnak nawl le nan ral teikhawhnak ṭhawnnak kan pek cang hna caah zeihmanh nih

an ti kho ti hna lai lo” (Luka 10:19). Zultu sernak nawl a kan pek: “Van le vawlei nawlngeihnak

vialte cu pek ka si cang. Cu caah khuazakip ah va kal ulaw miphun vialte kha ka zultu ah va

ser hna u... Cun hihi philh hlah u: nan sin ah a zungzal in, caan dongh tiang in ka um lai, tiah a

ti hna” (Matthai 28:18-20). Jesuh Khrih nawlngeihnak hrawmhmi he a kal cuahmah mi kan si

kha philh hlah.

5th: BAWMTU THIANG THLARAU KAN NGEI. Khrih chung ah Khrih halpiaknak thawngin

Pathian fa a simi hna cu bawmtu Thiang Thlarau pek kan si. Ka Pa kha ka hal lai i Bawmtu

Thiang Thlarau, biatak phuangtu an pek hna lai i, a zungzal in an umpi hna lai (Jn 14:16,17).

Pathian fa nan si caah khan, Pathian nih, a Fapa Thlarau cu nan lungchung ah a run thlah i cu

Thlarau nih cun, Ka Pa, Ka Pa, tiin a au (Galati 4:6). Thlarau theitlai cu, dawtnak, lawmhnak,

daihnak, zaangfahnak, lungsaunak, ṭhatnak, zumhtlak sinak, toidornak, le mahlemah

teikhawhnak an si (Gal 5:22,23).

Zumtu hna,

Jesuh Khrih kan Bawipa nih nawlngeihnak hrawmhmi le nawl pek kan si cangnak hi

zeitikhmanh ah philh hlah usih.