top of page
Search

Pathian nih Biak Ningcang hi Biapi ah A Chia Maw?

Writer: Pastor Za He Lian
Pastor Za He Lian
Nov 3
4 min read

November 1st, 2026

Pastor Za He Lian


Johan 4:24 chung ah kan hmuhmi cu, “Pathian cu Thlarau a si i a biatu hna nih cun

Thlarau le biatak in an biak awk a si,” tiah a ti. Dr. Rual Uk nih a chapchihmi cu ‘hrim hrim’

hi a si. Hi Baibal cacang nih a van fainter mi cu Pathian hi biatu a simi minung nih duh ning

poah in biak a duh lo ti hi a si. Amah Pathian lila nih “ka bia u” a ti ning tein kan biak lo

ahcun cu kan biaknak cu pakpalawng a si hnga. Cu ti a si ahcun Laimi nih Pathian hi

zeitindah kan biak ve ning a si hnga?


Laimi nih Pathian kan biak ning keimah ka hmuh khawh tawk in ka van ṭial lai.

Minung vialte hi Pathian sermi, Pathian kutchuak kan si dih hna. Pathian nih a kan ser ah hin

a kan sertu Pathian biak ding zong aa tel chih. Cucaah minung a simi poah cu biak he ṭhen

awk a ṭha lomi kan si dih. Minung a simi poah cu pakhatkhat a bia mi lawng te kan si. Rom

1:25 chung ah “Sertu a biami le sermi a biami” tiin kan hmuh. Sertu Pathian maw kan biak?

Sermi dah kan biak timi tang ah khua a sa mi lawng te kan si.


Sertu Pathian nih Amah tein siloah Amah le Amah minung sin ah aa phuan lo ahcun

sermi minung nih Pathian theih khawh taktak a si lo. Adam le Eve zong sualnak chung ah an

tluk hnu ah Pathian kawl loin Pathian sin tuin an zam i an i thup. Adam le Eve a kawltu hna

cu Pathian lila kha a si. Minung nih ser chommi phunglam in Anung mi Pathian hi biak

khawh a si lo. Cucaah ningcang tein sermi minung nih Pathian kan biak khawhnak ca ding ah

Amah lila nih biak ning a kan chimh i lam a kan hmuhsak a hau.


Nihin kannih chan ah cun Pathian Bia a simi Baibal hi kanmah holh tein kan rel

khawh cang. Cucaah Baibal hmang in Pathian nih zeitin ka bia hna seh ti a duhnak kha a

biatu hna nih kan kawl i kan biakmi Pathian duh ning tein kan biak ding kha thil biapi ah kan

chiah hrimhrim a herh. Cu Pathian kan biaknak ah kan nunphung hna kan telh tuk maw?

Vawlei thilri hna kan cawh tuk maw? Pathian duhnak si lem loin mipi duhnak hna in Pathian biaknak ah caan hna kanhmang sual maw ti hi Baibal hmangin felfai tein le ṭha tein kan zoh

ṭhan a hau. Laimi Pathian kan biaknak hi Baibal chungah lut loin pawngkam hoih, sining

hoih deuh in a biami kan si. Pathian kan biaknak ah Biabal nih hruai lem loin thinlung

cawlnak (Emotions/feelings) deuh nih a kan hruai. Thinlung cawlnak (Emotions/feelings) hi

a herh vemi a si nain Pathian biaknak ah cun hruaitu dingah si loin bawmtu ding lawng ah an

si. Bawmtu kha hruaitu; hruaitu kha hruaimi ah kan kalter caah Laimi Pathian kan biaknak ah

a tak nakin a deu tu nih hmunhma a lak lengmang tawn. Cucaah Pathian kan biaknak ah

Pathian aa phuannak a simi Baibal nih a kan hruai hrimhrim a herh.


Biatu a simi Laimi nih kan philh tawnmi cu, biatu lungtling le diriam nakin biakmi

lungtlin le diriam kha a bia deuh ti hi a si. Nupi hal ah a kal mi hna nih nu lei chungkhar

lungton kha biapi ah an chiah i nu lei lungtling ding tein bia an chim khawhnak ca ding ah nu

lei phunglam zong a thei mi an i sawm i an fapa caah nupi hal an kal bantuk in, biatu hna

zong nih biakmi lungtlin le diriam kha aa tinh awk hrimhrim a si.


Kanmah Laimi chung ah cun kan biakmi Pathian diriam le lungtlin nakin pumpak

biatu diriam le lungtlin kha biapi deuh ah kan chiah. Kan lungthin cu Pathian cungah si loin

kanmah le kanmah cung ah a um (Your attention is on yourself, not God.) Hi lungput in

Pathian kan biak ko rih ding a si ahcun Pathian a bia mi si ti loin mah le mah diriamnak kha

Pathian biaknak hmangin tlinter aa timtu kan si— cucu sialsal biak he aa khat ṭhiamṭhiam mi

a si caah kan kal taak hrimhrim a hau. Sialsal biak kan timi cu Rom 1:25 chungah kan hmuh

bantukin, sermi biak kha a si ko.


Pathian cu ning cang tein thil a tuaktan i thil a tuahtu a si. Duhsahlam poah in huam

ah huam caan, huam lo ah huam lo caan bantuk in a um mi a si lo. Amah biak tik zong ah

biatu hna nih duh ning le uar ning in silo in Amah nih a duh ning te, aa phuan ning tein biak

hi a duh mi a si caah ralring tein Pathian hi bia aa timmi si hna usih tiah Bawi Khrih min in

kan in sawm hna.


Lunglawmhnak nganpi he,

Pastor Za He Lian

 
 
CEBC's logo

All Rights Reserved © 2025 Chin Evangelical Baptist Church, Inc.

"ZUMHTLAK SALTHA"

  • Facebook
  • Instagram
  • Spotify
  • YouTube

ADDRESS

5610 S. MERIDIAN STREET INDIANAPOLIS, IN
46217

CONTACT

PHONE: 317-613-0144
EMAIL: INFO@CEBCINDY.ORG

bottom of page