BIBLE MIT IN MINUNG PHUN HNIH
May 3rd, 2026
Rev. Ram Maung
Hi vawlei ah hin minung phun hnih kan um timi cu kan sining, ruahning, ziaza, asiloah hmuhning aa dannak langhternak caah hmanmi a si. Hi biafang hi biaruahnak le fimthiamnak biafang a si i a harmi minung ziaza kha aa dangmi phun hnih fianternak le chimhnawh chan bik cu a si. Socrates nih, “Minung cu minung phun hnih in sermi kan si: mihrut ka si ti aa hngalmi mifim hna le mifim tiah aa ruatmi mihrut hna” tiah a ti.
1. Zumtu le Zum lotu –
● Johan 3:16, 36 Zeicahtiah Pathian nih vawlei hi a dawt tuk caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai... [36] Fapa a zummi paoh cu zungzal nunnak an ngei lai, sihmanhsehlaw Fapa a hlawmi paoh cu nunnak an hmu lai lo, zeicahtiah Pathian thinhunnak cu an cungah a um ko lai.
2. Thlarau hruai mi le Titsa minung –
● Ka chim duhmi cu hihi a si: Thlarau nih nan nunning kha lamhruai seh law nan minung sinak duhning kha zul hlah u. 17 Zeicahtiah kan minung sining nih a duhmi cu Thlarau nih a duhmi he khan aa ralchanh i Thlarau nih a duhmi cu kan minung sining nih a duhmi he khan aa ralchan. Annih pahnih cu ral an si. (Rom 7.15-23 'Galati 5:16-17)
3. Jesuh nih Ahohmanh a ka ṭanh lomi cu ka ral a si –
● Matthai 12:30. Hihi Bawipa nih minung hi phunhnih lawng an um tiah a ti: (1) Amah he a ummi le (2) Amah he aa ralchanhmi.. Matthai 12:30 [Jesuh nih] “...ka sinah a pumh lomi cu a ṭhekmi a si,” tiah a ti.
4. Pathian fale le Khuachia fale –
● Matthai 13:38, KJV “...thlaici ṭha cu Pennak chung i a ummi kha an si, sihmanhsehlaw belh cu Miṭhalopa fa kha an si.”Kolose 1:13, NLT Zeicahtiah muihnak pennak chungin a kan khamh i a
dawtmi a Fapa pennak chungah a kan luhpi.
5. Kutka bi le Kutka kau – Kutka bi in a lutmi an tlawm; a tam deuh cu rawhnak lam kaupi ah an kal (Matthai 7:13-14)
6. Thei ṭha le thei chia – Thei ṭha a tlaimi nunnak cu a hmun; thei chia a tlai mi cu hau an si, a lo zau lai. (Matthai 7:18-19)
7. A fimmi innsatu le a hrutmi innsatu – Khrih hrampi cungah sakmi nunnak cu a hmun; a
derthawmmi Vawlei cungah dirhmi cu an tlu (Matthai 7:24-27)
❖ A tawinak in: Jesuh nih minung phun hnih lawng a hngalh hna — Amah he aa pehtlaimi le
Amah a dohtu. A karlak hmun a um lo
● Mi vialte cu Jesuh he an i pehtlai asiloah a dohtu an si. A dang lam a um lo.
● Amah he kan i pumh lo ahcun, Amah sin in kan i ṭhek a si.
● Jesuh chungah zungzal nunnak a um. Amah a dohtu hna nih Pathian thinhunnak an ton.
● Jesuh ah khamhnak kan co khawh i khamh kan si. Jesuh tel loin kan tlau.
● Jesuh thawngin Pathian cu kan Pa a si. Jesuh tel loin Satan cu kan pa a si. Jesuh chungah zungzal Pathian pennak chungah kan lut. Jesuh tel loin Satan muihnak pennak chungah kan um ko lai.
● Jesuh chungah ceunak chungah luhpi kan si i Pathian le a ṭhawnnak ta kan si. Jesuh tel loin muihnak le Satan ṭhawnnak chungah kan um.
● Jesuh thawngin hrinṭhan kan si i zungzal Pathian pennak cotu a khamhmi “tuu” kan si. Jesuh tel loin chiatserhmi le zungzal mei ah thlakmi “meheh” tlau kan si.
Tlangkhawmnak - Hi Cathiang rel dih hnu ah, a fiangmi biahalnak cu, “Zeibantuk minung dah ka si?” ti hi a si awk a si. Mah biahalnak a phi cu a fiang ko lai. Hi vawlei ah zeidah “na lungthin na chiah” tiah nangmah le nangmah i hal. Pathian thil duhnak na ngei maw tiah nangmah le nangmah i hal. Pahnihnak ah, Pathian le a bia cungah na lungput zeidah a si ti kha nangmah le nangmah i hal. Pathian Fapa, Jesuh Khrih kongah zeitindah na ruah ti kha nangmah le nangmah i hal. Pathian Bia kha na dawt maw, cun tling tein na zulh lo hmanh ah Khrih zumhnak in zulh naa zuam maw? Hi biahalnak hna i a phi nih na hmailei kong a khiah lai, hell maw vanram dah. Mah hna hi thil hme tete an si lo, nunnak ah a biapi bikmi biahalnak an si. Na nunnak kha zaangfahnak tein tuaktan (2 Kor 13:5). Vawleicung ah minung phun hnih lawng kan um!
