Ruahchannak

April 5th, 2026

Rev. Thawng Lian

Ruahchannak hi minung kan nunnak ah ngeih kan herh ning hi a lang. Ruahchannak kan ngeih lo ahcun lungzawtnak (depression) timi zong hi a chuak kho. Daithlan i thlopbul loin um sual ahcun mah le mah tiang harnak i pek i nunnak i laak a fawi te. Mah hi thil hi USA um Laimi nih kan ton cuahmah mi a si. CEBC ah Pastor rian a ṭuan mi ka si ve tik ah, chungkhar members hna len thlacam piaknak ka ngei tawn hna i chungkhar cio ah kan buai bik mi cu nulepa nih Mirang holh kan thiam lo ruangah maw, fale nih nulepa nawl an ngaih lo ruangah maw, nulepa nih kan

fale duhnak kan hngalh piak hna lo ruangah maw, kan thinlung a dam lo ruangah mah le mah nunnak ai la mi hi an tlawm ti loh. Ruahchannak ngeih ti lo hnu ah cun nun hi huam a si ti lo. Depression a ngeimi hna he bia kan i ruah tawn hna i an chim bik mi cu an i ruahchan mi a tlam a tlin lo ruangah a si. Ruahchannak hi an rak ngei dih cio ko nain an tlam tlin lo tikah fak tuk in an tuar hi a si tawn. Minung hi mah le si tawk cio in ruahchannak ngeih cio a si. Taksa ah kan i ruahchanmi nih hin zeitluk in dah kan thinlung a thawnter i kan taksa zong nih in-tuar khawhnak a ngeih ti ah cun, keimah hi 1994 ah Malaysia ah ka rak kal i Bangkok tiang cu passport le visa ngei in vanlawng in kan rak zuang. Sihmanhseh, Malaysia ram luhnak ding ah cun visa loin tanglei in Thailand agent hna nih an thiamnak in luhpi kan rak si. Kan kalnak ding lam kha Malaysia police nih an bawh tik ah ramtang hna ah rawl lo ti lo hna in kan rak um. Mah lawng si loin lam hruaitu Thailand agent hna nih vuak deng zong ton a rak si. Cun Malaysia ram chung kan van lut i police nih tlaih i thong thlak hna zong kan tong. Sihmanhsehlaw, mah harsatnak kan ton lio zong ah ni nikhat cu Malaysia ka phan hrimhrim lai i rian ka ṭuan lai, kan khuasak tuntuk a rem ko lai tiin kai ruahchan mi nih ka tha a nuamhter peng ko. Cucaah,

ruahchannak kan timi hi taksa lei zong in kan nun bawmtu a si ti zong ah mifim nih an ti phahmi hi a si ṭheu lai. Ruahchannak hi mifim nih research an tuahmi ah an hmuhmi cu, kan i ruahchanmi nih an kan hrawk khotu thil phun nga (5 ) a um tiah an ti. (1) Ngandamnak (2) Dawtnak (3) Rumnak (4) Rian ṭha le (5) Luatnak hna hi an si. Kan ngan a dam lai i thil tampi kan tuah lai tiin kan i ruahchan lioah dam loin cancer hna ngeih a si ko. Dawtnak - Nupi le fale he kan i daw tuk lai kan ti i ruahchannak nganpi kan ngeih lio ah i daw manh loin iṭhennak

hna kan cung ah a tlung. USA kan phan lai i sushi, thingthei dawr, arr zuatnak hna kan tuah lai i kan rum ko lai hme cu kan ti i ruahchannak lianpi kan ngeih lioah sunghzatlaknak nih phak khawh kan si. Ka rian a ṭha tuk e kan ti lio ah a kong tampi ruangah rian ngeitu nih kan rian chuh khawh a si. Kan ram ah zalong tein le luat tein kan um lai kan ti lio ah luatnak hmanh ṭha tein tep kho loin kan luatnak lakpiak kan si. Kan i ruahchanmi hi a tlamtling lomi vawlei ah kan um caah lakpiak khawh kan si. Kan i ruahchannak hi ngandamnak le rumnak hna i aa hngat tuk sual ahcun cu kan i ruahchannak lakpiak kan si tik ah kan i ruahchanmi lila nih lungrawhnak a kan ngeihter. Mah ruang ah kan i ruahchanmi a hrampi cu Zisuh khrih ah kan bunh ding a si. Zisuh khrih cu aa thleng bal lo Mi, a kan umpi pengtu a si caah kan i ruahchannak hi amah chung ah kan khumh ahcun vawlei nih a chuahpi mi harnak le sunghzatlaknak, thihnak nih an kan den tikah cu kan i ruahchanmi Pathian nih cun iin khawhnak, ṭuan khawhnak a kan pek. Depression a ngeimi hna hi sibawi nih an thlopbul hna lawng si loin therapy ti mi an kaiter hna. Therapy a kaimi ahhin pa hi nu nakin an dam har deuh. Zeicaah tiah cun, pa hi nu nakin bia a chim lo deuhmi kan si. Kan tonmi thil hi nu bantuk in chim colh kan hmang lo, kan chung ah kan

erhter. Lawmhnak, ngaihchiatnak kan tonmi zong khi nu bantuk in ek lakin chim thlu loin kan i kenretmi a um peng caah le pawcawmnak caah thingrit lungrit, rian hrang a ṭuan i, nu nih an tuah khawh lomi a tuah i pumsa ah rethei deuhmi kan si caah nu nakin kan dam har deuhnak a si an ti. Zumtu hna kan i ruahchanmi Pathian ah hram kan bunh tikah kan cung ah zei thil dah a um kan ti ah cun kan member chungkhar pakhat an pa nih mual a liamtaak hna. An fale an hngakchia i rianṭuan kho an um lo. An nu nih le hngakchia a umh hna ruangah rianṭuan thiam ding a si fawn lo. Minung leikap cun lungdong bak an si. Sihmanhsehlaw, an nu hi Bawipa ah hram bunhmi a si caah a chimmi cu kan pa nun lio zong ah Bawipa nih an kan cawm i kan pa um lo hnu zong ah Bawipa ṭhiamṭhiam nih an kan cawm ko lai a ti i a hna a ngam, a lungre a thei loh.

Taksa in an pa ai bochan tukmi laakpiak sihmenhsehlaw, ai ruahchanmi Bawipa a si tik ah lungrawhnak nih a nunnak a uk kho lo. Zisuhkhrih nih zeitindah an kan kamh? Zeidah kan i ruahchan lai? 1 Thesalon 4 - 13 ah, U le nau hna, ruahchannak a ngei lomi hna an ngaih a chiat bantukin nan ngaih a chiat nakhnga lo, nannih cu a thi ciami hna kong i biatak kha hngalhter kan in duh hna. (14) Jesuh cu a thi i a tho ṭhan ti kha kan zumh. Cucaah amah zumh buin a thi mi

hna cu Pathian nih amah sinah cun a ratpi hna lai ti kha kan zumh. Atu bantuk in zumtu hna nih kan i ruahchanmi hi vawlei ah a dongmi a rak si loh. Vawiei thil i kan i ruahchannak cu vawlei ah a dong kho. Vawlei ah harnak lungretheihnak kan ton tikah ruahchannak a ngeimi hna le ngei lomi hna kan i dannak van langhter ka duh. 2007 lio ah Malaysia Airline nih a tlaihmi vanlawng pakhat khual a tlawnnak ah an tla i ai cit mi an nunnak a liam dih. Mah a thi mi chung ah Khrihfa

zumtu hna le khrih zumlotu Muslim biaknak (Islam) an i tel hna. Mah lio ah zumtu he zumlotu he ngaihchiat cio cu a si. Malaysia vanlawng ṭuanvo ngeitu hna nih nan ngaihchiatnak nan diriam in ṭial u law nan thaw i chuah uh an ti hna i airport inn leng ah caṭialnak ding whiteboard an chiahpiak hna. Mah ah cun zumlotu hna nih an ṭialmi cu zei caah dah nan vanlawng ṭha tein nan zohkhenh lo, zei ruangah dah ka nu/pa, ka fa nan thihter? tiin pamhnak ca le chiatserhnak, vuivainak lawngte an ṭial. Khrih zumtu hna nih cun Bawipa kan tonmi thil hi nangmah remruat a si ko. Kan nunnak thaw a ngeitu hi nangmah na si ko caah kan caah a ṭha bik khua na khanmi a si ko tiin Pathian sinah lawmhnak an chim lawng si loin, Malaysia vanlawng rianṭuantu vialte hna zong Zisuh min in thluachuah an pek hna ti si. Cucaah, Khrih zumtu hna i kan i ruahchanmi cu vawlei pinlei cunglei kan nun dingmi khi a si. Vawlei kan nun lio ah kan duh ning tluk in kan i ruahchannak nih kan deuh in tling hmanh hlahseh law, mi a deuh ve ti lo mi kan Pathian

le zungzal hmun ding mi Vancung khua kan i ruahchanmi nih kan tha kan nuamhter peng ko seh. Hi ca a reltu nan zate cungah kan i ruahchanmi Pathian thluachuah tlung ko seh.

Upatnak he,

Rev.Thawng Lian

Associate Pastor