top of page

Pastor Aanka Vol. 8

ZAANGHLEICAWI NUN

French thiamsang pakhat cu USA a rak tlawng i a kir khawh ah thawngzamhnak nih biahalnak an tuah. A chimmi cu, USA cu tluk awk an ṭha hrim lai lo, zeicahtiah an ram pi khi zaanghleicawi nun in an tuam dih e, a ti hna.

Aa manhlo tukmi kan nun ah zaanghleicawi caan hmuh hi a har ngai. Asi nain midang caah caan va pek le zaanghleicawinak nih thiltha thildawh tampi a chuahpi hlei ah Khrifami caahcun kan zumhnak theipar zong a si chih ve.

Midang caah caanpek, zaanghleicawi nak nih taksa, thinlung, thlarau damnak tiang a chuahpi khawh. Umharnak, lungretheihnak, lungzuurnak teinak le thinlung damnak a petu a si fawn. Cucaah phunli hrawng in a hlawknak kan chim hmanh lai.


Hlawknak1: MIDANG NUN A KAN HRAWM TER.

Zaanghleicawinak nih midang nun a kan hrawm ter ve. Midang an harnak, an olnak, an ngaihchiatnak, an i lawmhnak, bawmh an herhnak kan i hrawm kho. Kan Khrifabu, kan community caah ṭhatnak tampi a chuak. Um duhnak hmunhma tha deuh a ser. Midang nun ah a ṭhalei in dannak a chuahpi. Thil hmete kan bawmh tawnmi hna zong a ṭhahnem ngaingai tawn. Cun, hawikom thar a kan ngeih ter, kan zatlang ramri a kau deuhdeuh fawn, midang pehtlaih thiamnak a kan chap chih fawn. Mithar kan si zong ah, mihlun deuh kan si zong ah zaanghleicawi nun kan ngeihmi nih mi tam deuhdeuh a kan hngalh ter, hawikomthar tampi a kan ngeih ter, hmunkhat ah thla kan cam ṭi, rian kan tuan ṭi, lente kan i celh ṭi, kan cawlcang ṭi. Zaanghleicawi nun kan ngeih tik ah midang he pehtlai zia kan thiam deuh fawn. Midang he pehtlaih thiam hi vawlei cung ah an uarbik mi thiamnak pakhat a si ve. Cuti kan ngeih deuhdeuh tik ah zapi lak ṭhutdirzia kan thiam chin lengmang, meeting tuah zong kan thiam deuh, biachim zong kan thiam deuh, midang he pehtlaih zia kan thiam deuh chin lengmang.

Cun, fale caah zohchuntlak nun a si. Ngakchia cu kan tuahmi paoh a kan zohtu an si. Zaanghleicawi nun kan ngeih ahcun kan fale zong nih a caan a phanh tik ah an kan cawn ve tawn.


Hlawknak 2: NGANDAMNAK A SI

Zaanghleicawi nun nih taksa, thinlung, thlarau damnak a kan pek. Midang lungfahnak, harnak kan I hrawm tik ah kanmah nun kha a kan zohter ve, tuar awk, hrial awk, cawn awk thil tampi a kan chimh ve. Lungretheihnak kan ngeih tawnmi kha a kan teipiak ve. Harnak kan ton tawnmi kha a kan teipiak ve. A hark an timi bia le hla hna kha a tuarzia kan thiamnak ve.

Zaanghleicawi nun hi a thiammi nih an chim tik ah, lungrawhnak (depression) zong a tei bak an ti. Zeicahtiah zaanghlei kan cawi tik ah midang he kan i pehtlai peng i pakhat le pakhat i bawmhnak lungput a ṭhang, a karh, a hmual a um chin lengmang. Cunih cun lungrawknak kha a kan teipiak.

Cun, zaanghleicawi nun nih lawmhnak a chuahpi. Nuamhnak, lawmhnak kan ti tik ah lenglei nuamhnak (happiness) lawng silo in chunglei lawmhnak (joy) a chuahpi chin lengmang. Kan thluak le kan lungthin ah lawmhnak a fehter chin lengmang. Cucaah tamdeuh kan i pek paoh ah tamdeuh lawmhnak kan hmuh ve nak a si.

Zaanghleicawi nun nih mahle mah izumhnak (confidence) a kan pek fawn. Miralchia sinak, mahlemah zeisilo ah i chiah pengnak chung in a kan luat ter. Midang kan bawmh hna nak nih tlamtlinhnak te khi kan nun ah a luhter ve caah mahle mah lunghmuihnak, lung hnangamnak le hmailei cuanh ngamnak a kan pek chih. Nun sullam zong a kan hngalh ter chin lengmang. St Francis sizung (Indianapolis) ah zaanghlei a cawimi kan hawipa nih cun, atu lio ka cawlcanghnak nih ka nun sullam a ka fianter chin, cuhlan vialte kha ka tuahmi paoh hi phaisa he aa pehtlai dih, atu cu phaisa kong ruah a si ti lo, zeitindah midang ka bawmh khawh hna lai timi lawnglawng ka nun a uktu a si cang e, a ti..


Hlawknak 3: THIAMNAK AI CHAP

Zaanghleicawi nak nih a chuahter mi pakhat cu kan tuahmi kan thiam deuh chin lengmangmi hi a si. Zeibantuk rian kan tuahmi zong ah kan thiam deuhdeuh. Kan naunu pakhat, innpawng hramhriam ka thiam ballo nain mino nih zaanghleicawi kan tuahnak ah hramhriam an ka chimh i ka thiam colh. Ka riam tthan lengmang tik ah ka thiam chin lengmang tiah a ti. Thil hmete a si nain thiamnak ai chap peng. Cubantuk in zeibantuk thil zong ah zaanghlei kan cawinak nih thiamnak a kan chap chin lengmang.

Pathian nih pahrang a kan pek cio mi khi hmang lo in kan um tik ah a haar kho lo. Zaanghleicawi nak hmun hi kan pahrang kan hman khawh caan, kan haar ter khawh caan cu a si. Cun, thiamnak pin ah a muru ngai a simi zawnruahnak lungthin, lungthin kauhnak, tuahzuamnak le thil a thalei in hmuhthiamnak a kan chap chin lengmang fawn.


Hlawknak 4: NUN THIMTHIAMNAK A KAN BAWMH

Zaanghleicawinak nih kan duhmi le kan huammi, kan zuammi thinlung khi a fianter ngai. Ka nunnak lamthluan ah zeidah ka huammi a si hnga, zeidah tuah ah a tthat hnga ti tiang khi hmuhkhawhnak a kan pek fawn. A bik in mino hna nun ah caan saupi nunpi ding ah zeidah ka duh hnga, zeidah ka chunmang (vision) a si timi cu zaanghleicawinak in hmuh khawhmi tampi a um tawn.

Zaanghleicawi caan hi zarhkhat ah suimilam 2 hrawng a za ko tiah a hngal deuhmi nih an kan chimh tawn. Cu nihcun kumkhat ah suimilam 100 hrawng zaanghleicawi caan a chuah ter an ti. A caan belte sehchih tein suai ve ah a tha an ti fawn.

Zaanghleicawinak hmun cu Khrifabu zong ah a si kho, community chung zong ah a si kho, mahle naihniam bawmh hau timi hmun zong a si kho, itel peng kha a thabik.

Cucu nihin ah kan thlau lo dingmi nunzia, midang caah a herhtukmi nunzia –zaanghleicawi nun cu kan Khrifabu le zumtu hna zong nih kan philh ve lo ding biapi bikmi pakhat cu a si tiah ka ruah.

27 views0 comments

Recent Posts

See All

Comments


bottom of page