top of page

Pastor Aanka 19

Volume 19, 2022 (CEBC-INDY) November 06, 2022


Ralrin Kan Hau

Ai ralringmi minung cu a tlangpi in an him deuh pin ah ichuahsual zong a tlawm deuh ko. Theih lo ruang ah iralrinawk hngalhlo khawh a si nain theih ko mi thil zong ah mi hnangam le mi daithlaang phun kan um i harsatnak nih an hun kan tlunh taktak tik lawng ah ichiir lengmang hau in a umm ikan um. Vawleicung kan nun chung ah iralrin ding thil hi a tam in a tam kho tuk. Kan ngandamnak kong ah, kan humhimnak kong ah, kan rian kong ah le rianttuantti hawi sin ah, hawikom kong ah, innpa chakthlang he ipehtlaihnak ah, kan chungkhar kongkau nupi pasal le fale kong ah siseh a hlei in kan thlarau kong ah iralrin ding lawngte khi a si. Ralrin ka ti tik ah lau (panic) khi ka chim duhmi a si fawn lo. Zeizong vialte cung ah nawl angeitu le khua a khangtu Pathian kan ngeih caah daithlang in kan nung la ti awk a ttha lo.


Cathiang kan zoh tik ah le theologian hna nih Cathiang kong an chimmi kan zoh tik zong ah thil pahnih ai kalhmi a lo nain ai kalh ttunglomi le Cathiang nih a pahnih tein a kan cawnpiakmi cu Pathian khuakhan lairelnak le minung ttuanvo kong hi a si (the sovereignty of God and human responsibility). Pathian nih hin kan nule pawchung kan rak isemka in thlankhur kan luh tiang a kan hngalh cia dih cang bu ah (Salm 139:1-24) nun zia thiam ding le ralrin ding zong tampi ttuanvo an kan pek ve (Efesa 5:15-17). Ralrin ding tampi lak ah pastor dirhmun in thil pathum ralrin kan herh ko rua ti ka ruat.


1. Na Thlarau Caah (2 Korin 13:5; 2 Peter 1:10)

Kan thlarau caah ralrin a herh. Cathiang nih khamh zumhnak na ngei taktak maw ngei taktak lo ti kha nifatin tein idap/ihal peng law tiah a kan ti. A ruang cu minung hi voi khat lawng chuak ding le voi khat lawng thi ding ah sermi kan si tik ah (Hebru 9:27) kan nun chung te lawng hi ralrin caan kan ngeihmi a si. Na thih hnu ahcun a tlai tuk cang ding khi a si caah na nunchung tein zumhnak dik tak a ngeimi na si le silo idap/ihal lengmang uh tiah zumtu ai timi hna kha Paul le Peter nih ca an kuat hna. Khamh kan si tak le si tak lo cu Pathian le kanmah nih kan hngalh bikmi a si. Zumhnak nung a ngeimi nih thlarau lei ralrinnak nung a ngei. Hmur le ka ralrinnak, mit ralrinnak, thinlung khuaruahmi ralrinnak, hawikom ralrinnak, cawnpiaktu le cawnpiaknak diklo ralrinnak tibantukin a phunphun ralrin a kan pek. Cucaah, nihin te hi na nun rih ko ahcun zumhnak nung ka ngei taktak maw ti hi rak idap law rak ihal tuah law nai fian lo cun pastor te zong kan fuh ve.


2. Nunphung Ai Dangmi Kong Ralrinnak

A tu lio hrawng ah kan community chung ah kan iralrin ngai a herhmi pakhat ah ka ruahmi cu, tuanpi hmanh in ralrin rak ipek cia ding le rak ipek pahmi zong a si rua ka ti, ngakchia tonghtham kong a si. Midang fa a simi fale kan tonghtham dan hna hi iralrin ngaingai kan hau. Kan umnak ram le kan rak ratnak ram nunphung ai dannak tampi kan theih kan ti nain kan thei taktak tawn rua lo ti ka ruat. Ai dang ti cu kan ti nain zei tluk dah ai dan ti khi kan thei setset maw aw ka ti. Kan theih setset lo ruang ah ralrin hnga ding kan theih lomi a tam rua tiah ka ruat ko. Hika ram ahcun Lai lei bantukin “Nute, na hnuuk a bom cang maw?” tiah an ttang rak hmeh piak kha harnak rak tonnak a si lem lo. Nain, hika ram ahcun mi fanu kha cuti bantukin na va tuah sual i sianginn cachimtu le counselor tibantuk a chimh sual hna le nu le pa nih an in report sual ahcun kum 20-30 tiang thong pek khawh si.


Kan Laimi chung ah a tubantuk thil ralrinawk kan hngalh lomi nih a herhlomi fahnak le sunghzatlaaknak tampi a chuahter. Mi phundang fale chinchin cu tonghtham iralrin taktak kan hau (cuti ka ti tik ah kanmah Laimi fale cu a poi lo ka ti hrimhrim lo).

Cucaah, midang fale tonghtham hi a si khawh chung in iralring usih. Cupinah, nu le pa nih kan fanu le le kan fapa le hna hi lungfim an si hnu cun na tak hi midang itonghter hna hlah ti kha ttha tein chimh ding an si. Ralrin pek ve ding an si. Cuti ka ti tik ah kuttlaih te pawl le pahnih lungtling tein ikuh te pawl a ngah lo ka tinak si lo. Mi pakhatkhat nih nangmah lungtlinnak tello in in tawngtham hna hlah seh ti tu kha chim duhmi a si.


3. Nu le Va Kar Ipehtlaihnak

Kan umnak ram hi ram ttha a si caah rianttuannak ram a si. Sihmanhsehlaw nu le va tampi rian nih a kan nenh tik ah nu le va ihawikomh caan le ipehtlaih caan a tlawm tuk ahcun nu le va kar ah hma nganpi a chuahter khawh. Rian hna nikhat suimilam 12 ttuan, ttuanlo caan ah le Khrihfabu le khua le peng caah caan tampi pek, siloah hawi le kom sin ah caan va hman a si tik ah nu le va kar kan ipehtlaihnak a chambau kho. Thi le sa in sermi kan si cu titsa in ipehtlaih hrimhrim kan hauh caah a si. Nule hna, na pasal he ihawikomhnak caan pe kho lo tiang in na buai sual maw? Pale hna, na nupi he ihawikomhnak caan pe kho lo tiang in rian na ttuan sual maw? Ram le miphun le Khrihfabu ca ah nai pe tuk sual maw? Na nupi pasal nak in hawi le kom caan na pe deuh sual maw? Nu le va hi kan ipehtlaihnak a ngan a dam tik ah chungkhar a dam i, Khrihfabu le zatlang zong a dam. Cucaah nu le va nan ipehtlaihnak a ngan dam le damlo iralring usih law a tlol hlan ah iremh haumi iremh usih.


Ralrin ding a tam, nun zia thiam a biapi. Nifatin tein Thiang Thlarau lamhruainak tang ah nun i Khrih muisam lawh chin lengmang hi zumtu hna kan ttuanvo ngan taktak a si.


DOWNLOAD:PDF

Pastor Awann vol.19 (November 06, 2022)
.pdf
Download PDF • 1.25MB




32 views0 comments

Recent Posts

See All

コメント


bottom of page