top of page

Pastor Aanka 21

Volume 21, 2023 (CEBC - INDY) January 01, 2023

KHRIHFABU A LAMKIP IN THANCHONAK


Khrihfabu ah a lamkip in kan thancho khawhnak ding le thlarau taksa thinlung ah damnak kan hmuh khawhnak ding ahcun Pathian umpinak le Thiang. Thlarau lamhruainak kan herh bik. Cu pinah minung lei zongin riantuanti thiam hi a rak biapi tukmi a si ve. Lailei ah rawl kan chumh tikah lungthu pathun kan phun hna i, a cungah bel kan khin i rawl kan chumh tawn. Lungthu pathum cu hmunkhat tein a phunti lo ahcun pahnih lawngin bel khin khawh a si lo i, pakhat lawng zongin khin khawh a si lo.


Cu bantukin Khrihfabu cu Pastors, Khrihfabu riantuantu upa hna le mipi hna he hmun khat teah lungthu bantukin dirti le tuanti kan hau. Pastor lawng zongin dir khawh le tuan khawh a si lo bantukin riantuantu upa le mip lawng zongin dir khawh le tuan khawh a si lo. Kum 2023 chung cu Khrihfabu ah hitihin tuanti hna usihlaw tiah ka ruahnak tawite ka van langhter.


Khrihfabu Chung Riantuantu Upa Hna :

Riantuantu upa hna cu Khrihfabu chungah khuangkhangtu le laireltu an si bantukin Pathian sinah a rami fimnak le khuakhanti thiamnak ngeih a hau. Cucaah Pathian sinah thlacamnak ngeih peng le rawl hna zong ulh pah lengmang ve a herh ngai.


Riantuantu upa hna nih cun thinlung thian zong a herh bantukin nun thiam hrimhrim a herh tuk. Khrihfabu riantuan pah hna in zu le sa tehna tuah pah ahcun kan hruaimi mipi hna nih upatnak le tihzahnak a um kho lai

lo.

Pastors le riantuantu upa hna cu (Joshua 3:4) chungah kan hmuh bantukin a lamkip in zapi hmai ah dong 2000 in rak kal hmasa ding kan si. Mipi caah zaanghlei cawi dingin rian khinh kan si bantukin vuivai lo tein tuan I zuam ding a si.


‘’Khrih ca riantuan thiah nan si tikah a zumh lei lawng hi si loin a ca i temhinnak hmuh ding zong hi a si chih’’

(Filipi 1:29).


Women Ministry Cawlcangnak Tlawmpal :

Women Ministry nih tinhmi a ngeihmi cu CEBC Nule hna taksa, thinlung, thlarau an thancho khawhnak hnga biapi tein i hmaithlak a si . Pumhkhawmhnak, thlacamnak, hawikomhtinak, zohkhenhnak le cawlcanghnak a phunphun in thanchoter le Fale, Pasalle hna an thancho khawhnak hnga aherhning in kan Nule hna nih bawmh ding. Cun CBCUSA, Indiana Khrihfabu hna siseh, adang khrihfabu he aherh ning in hawikomhnak ngei zong a si chih. Caansau caah i a hmaithlak mi cu fale fimcawnnak- Child Care Ministry ngeih ding hna hi an si. Khrihfabu nule hna Thlarau taksa ah kan thanchonak ding ah tiin Worship Committee, Pulpit Group, MusicGroup, MediaGroup, Decoration Group, Rualuu Committee, Nutung No Committee, Care(Zohkhenhnak)Committee, Kitchen Committee tiin Committee le Group pa 8 in ser asi.


Nutung No hruainak in fitness, ai thium ka fanau lenkainak le fa no ngei le tha zaangpek, Music hruainak in Hlaremh Hlacawm, Care hruainak in a zawfakmi lenkai, Decoration group hruainak in Biakinn le zarpini pumhnak pangpar dawh tein tamh, Kitchen lei hruainak in chumhchuan cawnnak le a herhning in Khrifabu ah cawlcang a si. Azarh 2nak paoh ah Women Ministry pumhnak kan ngei i azarh 3nak Sunday paoh ah Bupi pumh hlaremhnak kan ngei. Cucu nule vialte thlarau in kan khah kan thawn i, taksa in kan dam i kan thanchonak ding caah a si.


Mipi Hna Kan Dirhmun :

Moses ram ahcun mipi hna nih an hruaiu Moses an doh, an nahchuah i a nawl an zulh duh lo pinah Pathian duhnak hrimhrim an tuah duh lo. Cucaah cawhnuh le khuaithliti chuahnak Kanaan ram an co khawh lonak a si. Sihmanhselaw Joshua ram ahcun mipi hna nih Joshua chimmi le a nawl an zulh hna i Pathian an i bochan. Cucaah Bawipa nih a hruai hna i Kanaan ram ah chungkhar tling tein an lut kho hna. Cucaah mipi hna kan dirhmun le kan rian cu khuangkhangtu upa hna nih an khanmi zulh le tuah khawh i zuam hi a si. Mipi nih kan thimmi hna upa hna le Kan Pastors hna nawl kan zulh duh lo i an bia kan ngeih duh lo ahcun Khrihfabu kar kan hlang kho lai lo. Kan Pastors hna le riantuantu upa hna tlamtlinlonak hmuhpiak le soiselnak kha i hrial in thazaang pek thiam le an caah thlacam piaktu si hna usih. Khrihfabu chungah pakhat le pakhat kan i dawt hna i, kanmah le kan rian cio ah biatak tein kan dir cio i kan tuan cio ahcun Khrihfabu a thangcho lai i Khrihfabu a dam ko lai.


‘’Nawlbia thar kan pek hna: pakhat le pakhat I daw u. Keimah nih kan dawt hna bantu hin pakhat le pakhat nan i dawt awk a si’’ (John 13:34).


Bawipa nih Khrihfabu kum 2023 kan kalnak dingah a Thiang Thlarau in lam kan hruai selaw kan umpi hram ko seh! Amen.



PDF Download:

Pastor Awann vol.21 (January 01, 2023).
.pdf
Download PDF • 1.23MB

80 views0 comments

Recent Posts

See All

Commenti


bottom of page