top of page

Pastor Aanka 20

Volume 20, 2022 (CEBC-INDY) December 04, 2022

TEAMWORK CAWNG VE

Mikip hi Pathian nih pahrang a kan pek cio. A kan pekmi cu aa dang cio i sang ngai le ṭhahnem ngai in a hmang kho zong kan um lai, a hmang kho lo deuh zong kan um lai. Sihmanhsehlaw pahrang a ngei dihmi minung hna nih hmunkhat riantuan kan hon thok cangka in pahrang ngeih cio mi lawng kha a za ti lo. A bu tein, hmunkhat te ah pahrang fonh cio in ṭuanṭi thiam tu kha a hong biapi deuh cang.


Cucu mirang nih teamwork an ti i kan holh in cun hmunkhat rianṭuanṭi thiamnak kan ti ko lai. Teamwork ahcun pumpak thiamnak kha a zor a herh caan a um, hleice in retheih lak caan zong a um, hleice in hlorh deuh a herh caan zong a um fawn. Zeibantuk dirhmun in kan i tel zong ah kanmah pumpak thangṭhat kawlnak ah siti lo in kan aiawhmi buu ṭahnchonak le ṭhatnak tu ah a si lai. Cucaah team work thiam cu mikip nih kan cawn a herhnak a si. Kan nule pawchung in kan hon chuahpi mi a si lo, cawn chom in thiam chin lengmang dingmi tu a si. Kan thiam dih ti zong a um fawn lo. Cawn pah in ttuan, ttuan pah in cawn pah i thiam chin lengmang mi tu a si. VAWLEI CUNG AH TEAMWORK A THIAMLOBIK MI CU DICTATOR PAWL LE DICTATOR LUNGPUT A NGEIMI AN SI. Annih cu anmah duhning lawng kalpi an duh i a tlamtlinnak hnga thahrum an hman zungzal. An duhnak a tlinnak hnga hramhram in mihnek an hmang. Mithah zong an ngamh. Cucu vawleicung ah an khat. Nangmah le keimah zong iralrin lo ahcun cu bantuk lungput ngeih khawh ngai a si ve. Cucaah teamwork kan cawn ve hrimhrim a herhnak a si.


TEAMWORK A THAWKTU HI PATHIAN A SI.

Minung a kan sernak ah a rak hman cang. “Cun Pathian nih cun, atu cu minung kan ser cang hna lai; kanmah mui an keng lai i kanmah he kan i lo lai” (Gen 1:26a). Teamwork ah aa dawh ngaingai mi biafang cu ‘KAN’ timi a si. Pathian hrimhrim nih a rak hman thawk cangmi biafang, ‘KAN SER LAI’ ‘KANMAH MUI’ tbk hi aa

dawhtukmi biafang cu an si.


TEAMWORK THIAM CU PATHIAN NIH A KAN FIALMI A SI.

Teamwork a thawktu Pathian nih a sermi minung hna zong teamwork thiam ve ding hi a kan fialmi a si. A bia ah fiang tein kan hmuh ko hna. “Pahnih cu pakhat nak in an ṭhahnem deuh, zeicahtiah an ṭuanmi rian khan tam deuh an hmuh khawh. ..thumthlak hrihrual cu a chah a har ”(Phungchimtu 4: 9-12). “Zeicahtiah kannih cu Pathian ca i hmunkhat ah rian a ṭuan ṭimi kan si” (1 Korin 3:9).


TEAMWORK CU TINHMI PAKHAT A NGEI.

“Khrih cu lu a si i amah chung ahcun pum cu a ningpi in aa khing. Pum chung i a ummi hliah le caang vialte nih pum cu kekkuai lo in an ṭem an ṭawn i pum chung i a ummi nge hna nih anamah le an tuah awk cio an rak tuahnak thawng khan, pum cu a ningpi in dawtnak in a ṭhang (Efesa 4:16). Kan lu a simi Khrih lei ah a lamkip in kan tthang.


TEAMWORK CU ṬUANHAWI ZAWNRUAH TIK AH A ṬHAWNG KHUN.

Teamwork ahcun duh zong duhlo zong ah lungrual tein ttuan kan herh. Enteinak, mahzawn lawng ruahnak, uahnak, midang zeirellonak pawl cu hmunhma an ngei lo. Zawnruahnak le khatle khat upat ipeknak tu nih a fehter. “Pakhat le pakhat i enteinak le mah pumpak thangṭhat kawlnak kha nan lak ah umter hlah u. .(Filipi 2:3). “Pakhat le pakhat kan i dawt khawh nak hnga le thilṭha kan i tuahpiak khawh nak hnga, i bawm thliahmah u sih” (Hebru 10:24).


TEAM WORK A ṬHAWNNAK CU MAHLE PAHRANG CIO KAN HMAN THIAM TIK AH A SI.

“Mi kha laksawng a petu hna cu amah kha a si; a cheu cu lamkaltu...a cheu cu profet ...a cheu cu Thawngṭha chimtu ...a cheu cu pastor le cawnpiaktu ah a ser hna. Khrih pum kha ṭhanter awk ah Pathian nih ..a timh hna” (Efesa 4:11-12). Teamwork ahcun mahle pahrang cio hmual ngei ngai in hmanthiam a biapi fawn.


TEAMWORK CU NGAIHTHIAMNAK LE DAWTNAK NIH A ṬEMTIK AH A TLING.

Itheihthiamnak le ingaihthiamnak hi teamwork ahcun a muru ngaingai a si ko. “Zeidang vialte nak in, pakhat le pakhat lungtak tein i daw u,..Pathian sin nan hmuhmi laksawng kha midang ca ṭhatnak ah hmang cio u” (1 Peter 4:8).


TEAMWORK CU PA SUNPARNAK PE TU A SI.

Teamwork ah aa dawhbikmi cu midang credit pek thiam kha a si. Credit pek ding hi Pathian lawnglawng a si. Cun, Pathian nih a hmanmi hna vialte kha credit pek ding an si fawn. Hruaitu cheukhat cu tuanpi hawi credit pek an i harh tuk tawn. “...zei nan tuah hmanh ah, nan ei ah siseh, nan din ah siseh, nan tuahmi cu a dihlak in Pathian thangṭhatnak caah siter ko u” (1 Korin 10:31). Amen.


RIANTHA KAN LIM KHAWHNAK HNGA TEAMWORK CAWNG CIO HNA USIH. Bawipa sunparnak caah si dih ko seh. Amen.


PDF Download:

Pastor Awann vol.20 (December 04, 2022)
.pdf
Download PDF • 1.18MB

41 views0 comments

Recent Posts

See All

Comments


bottom of page