top of page

PASTOR AANKA 15

Volume 15, 2022 (CEBC-INDY) June 05, 2022


CEBC Khrihfabu Ka Hmuhning


CEBC Khrihfabu hi Pathian nih a kan zaangfah caah Chinmi Khrihfabu lak ah a tam bik le chawva zong in a rum bik pawl kan si ti cu midang zong nih an kan timi a si i kanmah zong nih kan itimi a si. Cu sinak bel cu ruamkainak ah le porhlawtnak ah hman ding a si hnga lo. Pathian sin tu ah hitluk thil lianngan a tuahmi kong hi lunglawmhnak chim lengmang ding tu khi si i credit vialte hi amah lawnglawng nih a co ding a si. Kan umnak ram nih kanmah bantuk a tammi Khrihfabu cu “mega church” tiah an ti i a nganmi Khrihfabu tiah timi kan si. Hi kan sinak nih hin thil ttha tampi a chuahter bantukin zumtu chungtel caah thlarau lei damlonak zong tampi a chuak kho ve ti cu kan theih dih. A chuak cang tiah nan hmuhmi zong tampi a um lai. A tanglei ah hin kan ngan ruang ah thil ttha kan tuah khawhmi tampi a ummi le kan iralrin le hmailei kan zulh hrimhrim a herh tiah ka ruahmi pawl ka hun langhter. Kan ngan ruang ah thil ttha tampi a chuak. Tlawmpal lawng ka langhter hna lai. A pakhatnak ah, minung kan tamnak nih rianttuan a kan thiamter. Pastor hmanh hi pangaruk te kan si cang tik ah pakhat le pakhat Senior Pastor le Executive Pastor hruainak in zeitindah rian kan ttuan lai tiah ruahnak kan icheu. Thil pakhat kan lai ah a dang nih a tthatnak le iralrin awk thil tete an kan chimh. Midang ruahnak van hal le a kapkip van zoh zong a kan thiamter. Pastor pakhat lawg a simi hna Khrihfabu ahcun kha pastor pa nih a tuahmi paoh kha tuah a si ko i zohpitu ngaingai le a chiatnak a tthatnak ruahpitu ngaingai a ngei ti lo.


Amah pakhat lawng nih a ruahmi le a hmuhmi kha Khrihfabu nih a kalpimi ah a cang ko. Kannih tu cu pangaruk kan si tik ah ruahnak a tam i hmuhmi a kau deuh suaumau. Pahnihnak ah, mipi kan tam tik ah chawva a tam. Pathian nih a kan zaangfah caah thlakhat i kan thawhmi hi a cheuh khat Khrihfabu kum khat an itinhmi a si. Cu tik ah chaw le va in midang sin ah rian tampi kan ttuan kho i pastor dang le mipi hna zong nih Pathian thawng in an kan lawmh. Pathumnak le a donghnak ah, minung kan tam ruang ah Khrihfabu rianttuannak ah a herhmi zawn ah minung hman ding tampi kan um. Khrihfabu hme deuh ahcun minung pakhat kha hmunhma tampi ah cawl a hauh pin ah amah kha zapi nih ihngat a si tawn. Kannih tu cu a herhnak paoh ah van hman ding minung kawl ding kan umpengmi hi a ttha ngaingai. Sinain, a tthatlonak lei le kan iralrin ngaingai a haumi pawl langhter ka duh fawn.


(1) Kan Khrihfabu kong kan chimning iralrin kan hau. Midang he bia kan iruah tik ah kan Khrihfabu a ngannak kong le kan chawva a tamnak kong kha kan siasal bantuk ah a cang kho i midang va nam deuhnak le iporhlawtnak ah can khawh a fawi te. Khrihfabu hme deuh a ummi hna nih kan bia le hla an ei khawh lomi a um len. Cucu kan iralrin ngaingai a hau.


(2) Hmailei kong kan ruahthiam a hau. Nihin kan sining lawng ilawmhpi i a ra dingmi caan cu caan nih chuahpi te ko seh tiah kan ti sual nak hnga lo, caan sau chunmang le caan tawi chunmang tibantuk kan manh a hau. Cu kan manhmi zong cu chungtel zapi kan damnak ding caah a sia herh. A tu kan dirhmun kan ibuapi tuknak nih hmailei kong ruat kho loin a kan tuah sual ahcun hi kan dirhmun bantuk kan si khawh lo te tik ah kan tlaakning a faak tuk kho.


(3) Chawva kan ngeihmi, minung kan ngeihmi le kan thil ti khawhnak, midang kan huap khawhnak pawl hi a hmanzia kan thiamlo ahcun a poi ngaingai lai. Hmunhma kong ah, minung kong ah, kan pawngkam cozah, siizung, palik, sianginn tibantuk pawl hi a tu kan dirhmun nih cun kan hei chilh (influence) khawh ngai hna. Cucu a hmanzia kan thiam a hau.


(4) Ram dang kong le midang kong kan ruah tuk nak nih kanmah chung i phihkhar a haumi kan tlaamtlinlonak pawl a kan phenh ahcun a hnu ah kanmah hi kan zut tuk

lai. Kanmah hi caansau midang bawmkhotu kan si khawhnak hnga taksa thlarau ah kan dam taktak maw ti hi pastor le hruaitu vialte thok in mipi nih kan ruah ngaingai a herh. Kan damlo ahcun caan sau ah midang bawm khotu kan si ti lo kho. (5) CEBC chungtel kan sinak hi pakhatnak ah kan chiah a hau. Khua le pengtlang ttanhnak lungput hi a leng ahcun va ngeih cio ding a si nain Khrihfabu chung hrimhrim ah rak luhpi lo ding a si hnga. Khrih ah unau le chungkhar kan si timi hi pakhatnak ah kan zoh peng a herh lai.

(6) Pastor le hruaitu te nih chawnh le vehvat lawng kan bawh ahcun kan pil chin lengmang lai. Mah tein hmai fon ve, iteltum ve le cawlcangh ve a hau.


(7) A donghnak bik ah, chungtel hna hi pakhat le pakhat kan itheih deuh i kan ichawnh deuh a hau. Khual kan lo cang. Zarhpini ton caan, Khrihfabu nih a dang ton caan a hrihmi paoh ah itel i midang kan theih ballomi kha theih izuam kan herh. Timh ciammaam tein midang kha va chawnh le va theih kan herh.


Kan tthawnnak hi a hmanzia kan thiam a herh. Caan saupi midang caah a thlumalmi kan si khawh i Khrih thawngttha a karhtertu kan si khawh nak ahcun chungtel kan dam i saupi kan nguh a herh. Cu a si khawhnak hnga ding ah hruaitu kan biapit bantuk tein chungtel kan biapi tuk ve. Mithar a simi zong kan ipeih ve a hau. Mihlun zong nih kai peknak a sau ti a ngah lo. Kan zapi te hi Pathian nih a Fapa Khrih in a kan auh i a pennak kauhtertu ding ah hi vawlei kan nung chung rian khinhmi kan si.

23 views0 comments

Recent Posts

See All

Comments


bottom of page