top of page

PASTOR AANKA 12

Updated: Jun 5, 2022

Volume 12, 2022 (CEBC-INDY) March 06, 2022


LUNGSAUNAK

Catialtu : Rev. Dr. Thawngling Mualhlun

Lungsaunak sullam cu Dictionary ah hitin kan hmuh; ... thinhung lo tein tuar khawhnak ngeih khi a si, a ti. Baibal zong nih a kan chimhmi cu, LUNGSAUNAK cu Thlarau theitlai pakhat a si e, a ti ve. Lungsaunak cu minung a simi paoh nih kan ngeih khawh ahcun a thabik mi a si. Cucaah kan nun chung kan cawn peng ding subject pakhat a si ve. Vawlei bochanmi hna nih LUNGSAUNAK cu hitin an

chim cio ve. “Fing le tlang an thlithup cu lungsau hi a si. Lungsau cu thil pakhat na hngah lio ah zeitindah na um timi a langhter tu a si. Lungsau nih zeizong te hi a ol ter deuh. Thil lianngan hi lungsaunak lawnglawng nih a limter mi a si. Lungsau le teimak cu mitlehthiam (magician) bantuk in harnak vialte a tlauter khotu an si” (John Quincy Adams). “Lungsau le theihthiamnak cu nunnak muru an si. Mitha le mithalo hngalhnak cu lungsau a si. Tiva hi a lungsau mi cu a si. Donghnak kan phan te ko lai tiah an fiang I lungsau tein an luang ko. Thei a ngeimi thingkung khi lungsau a fiangmi an si. Lungsau tein an thang ko. Raltuk a thiammi le a thawngmi paoh cu lungsau le caan hngah a thiammi an si” (Leo Tolstoy). “Dawtnak le lungsau cu faphir bantuk an si. Dawtnak taktak ih cun lungsau a thiam. Dawtnak cu biadang in chim ahcun lungsau a si. Lungsau cu thut sawhsawh le hngah sawhsawh a si lo, hmailei hei hmuhchung khi a si deuh. Lungsau cu hling hmuh bu in rose par hmuh chih a si. Zaanmui kal pah in zinglei niceu hmuh chih a si. Nunnak cu lungsau tein cawn pengmi thil a si” (Billy Graham).


“Lungsau nih thawnnak nak in teinak tam deuh a hmuh deuh. Lungsau cu dernak a bawmtu a si. Lungsaulo cu thawnnak hrawktu a si. Nihin ah arti hmuhnak in thaizing ah arpi hmuh a tha deuh. Thil ngan hna hi chunmang sawhsawh manhnak in tlinh a si lo, kum saupi lungsau tein cawnnak nih a tlintermi an si. Lungsau nih a hrinmi

cu theihthiamnak a si” (Edmund Burke).


Pathian bia zong nih fiang tein zumtu hna kan herhning a kan chimh fawn. Thlarau theitlai pakhat hrimhrim zong a si caah lungsau cu kan cawn peng ding a si tihi a kan

fianter ko.

Kalati 5:22 Sihmanhsehlaw Thlarau nih a chuahter mi hna cu: Dawtnak, lawmhnak, daihnak, LUNGSAUNAK, zaangfahnak, thatnak, zumhawktlakmi sinak, toidornak le mahle mah I tei khawhnak te hna hi an si.

1 Korin 13:4 Dawtnak cu a lungsau. Efesa 4:2 Toidornak lungthin ngei u, lungnem le LUNGSAU in um zungzal u.

Pr 14:29a LUNGSAU in a um kho mi cu mifim a si. Rom 8:25 Sihmanhsehlaw kan mit in kan hmuh lomi kha kan I ruahchan ahcun, cucu LUNGSAU in kan hngah a langhnak a si.

Pr 16:32a Thinhun lei ah a khul a nuarmi (a LUNGSAU mi) cu thazang a thawngmi nak in a tha deuh. Salm 37:7a Bawipa hmai ahcun dai tein um ko law zeidah a tuah lai ti kha LUNGSAU in hngak ko.

2 Peter 3:9a Bawipa cu a biakam tlinter awkah a khul a nuar ko tiin mi a cheu nih an ruah bang in a si lo, nanmah cung I LUNGSAUNAK a ngeih ca tu ahhin a si deuh.

Kolose 3:12 Nannih cu Pahian mi nan si; ...cucaah mi zawnruahnak, zaangfahnak, todornak nemnak le LUNGSAUNAK kha nan I aih awk a si.

2 Timote 4:2 Phung kha chim hna, a caan a rem zong ah a remlo zong ah chim hna; al a herh ahcun al hna, chimhhrin a herh ahcun chimhring hna, a nawl in nawl a herh ahcun nawl hna law LUNGSAU thinfual in cawnpiak hna.


Cucaah hitin kan fian chin ding ah ka duh ko.

Mi LUNGSAU kan sitik ah ngaithiam khotu kan si chin lengmang.

Mi LUNGSAU kan sitik ah teima mi kan si chin lengmang.

Mi LUNGSAU kan sitik ah dawt thiamtu kan si chin lengmang.

Mi LUNGSAU kan sitik ah toidor thiammi kan si chin lengmang.

Mi LUNGSAU kan sitik ah bochantlak kan si chin lengmang.

Mi LUNGSAU kan sitik ah teinak hmumi kan si chin lengmang.

Mi LUNGSAU VALE cu nupi dawt thiammi an si.

Mi LUNGSAU NUPILE cu vale dawt thiammi an si.

Mi LUNGSAU NUPA cu fale dawt thiammi an si

Mi LUNGSAU FALE cu nulepa dawt thiammi an si.

Mi LUNGSAU HRUAITU cu mipi caah ruahchannak petu an si.

Mi LUNGSAU ZUMTU cu Pathian caah bochantlak an si.


Lungsau cu vawlei teinak zong ah hriamthabik ah aa tel, thlarau ram cawlcanghnak zong ah Thiang Thlarau nih zumtu kan nun ah a tthanter cuahmah mi theitha a si fawn. Cucaah minung a simi paoh nih LUNGSAUNAK cu kan cawn ve a herh i, zumtu chinchin nih cun kan hriamthabik ah kan hman a herh ngaingai mi a si.

18 views0 comments

Recent Posts

See All

Commentaires


bottom of page