top of page

PASTOR AANKA 11

Updated: Jun 5, 2022

Volume 11, 2022 (CEBC-INDY) February 06, 2022


CHUNKHAR NUAM SER HNA USIH!

Laitlang kan um lioah kan pale hna nih vanram pahnihnak tiah an rak ti tawnmi cu atu kan umnak US ram hi a si. Vawlei cung sianginn tha vialte, mifim thiam, mirum thawng le min thang hna an umnak ram zong a si. Asinain kam khat in van cuanh than tikah mithah lainawnnak, mahle mah i thahnak le nule va i thennak a tam biknak ram pakhat zong a si. Kum 2020 ah mah le mah a thatmi hi 45,855 an si i, nule va ai thenmi hi (50%) an si. Laimi zapi cu US ram kan umnak kum 15-20 hrawng a tling ve cang. Kum tampi a si rih lo nain chungkhar buainak le nule va thennak hna hi kan ton ngaingai cang. Fanu le fapa a vaivuanmi le a rawkral mi zong an tlawm ti loh. Cucaah chungkhar kong hi fak dueh le biapi deuh in ruah hna usih. Chungkhar nuam kan ser khawhnak dingah ka hmuh ning le ka ruahnak pa li in van langhter ka duh.


1. Pathian Bia In Chungkhar Ser Ding

Zeiruang dah US ram ah nu le va thennak a tam tuk ti ahcun an chungkhar hi Pathian bia in an ser ti hna lo i pumpak zalawnnak le nuamnak lawng an kawl cio cang caah a si. Vawlei cung mirum bik an rak timi Bill Gates le Amazon a dirhtu Jeffrey zong nih chungkhar nuam cu a phunphun ruangah an ser kho lo. Chawva le rumnak nih chungkhar nuam a ser kho lo ti hi a fiang ngaingai. Cucaah chungkhar nuam sernak dingah cun Pathian bia lawnglawng hi a si ko. Inn satu pa nih chun nitlak tein Inn a sakmi le khuavengtu pa nih zan khuadei tein khua a venmi khi Bawipa a tel lo ahcun san a tlai lo i, khuasak tuktuknak zongah zingka tein thawh i zan tlaipi ah ih lengmang zong hi Bawipa a tel lo ahcun san tlai lo tiah (Salm 127:1-2) ah a ti.


2. Nule Va I Dawt Ding

Nule va cu kan thinlung, kan ruahnak le kan zeizong te ah pakhat kan si a herh. Vale nih kan nupi le cu kan dawt bik hna awk a si i nupi le zong nih kan vale cu kan dawt bik hna awk a si. Kan hawikom tha bikmi le kan i bochan bikmi hna zong an si awk a si. Kan karlak ah bia thli umter ding a si loh. Nu le va i theihternak um loin tangka kuat le a thli tein thil dangdang tuahnak nih i hmuhthiam lonak a chuah ter. Nule va bank account i theihter duh lo, account pakhat hman ti duh lo le facebook password i theihter duh lo ti bantuk hna nih a ngandam lomi pehtlainak a chuahter pin ah kan i dawtnak a zorter i a dongnak ah cun kan ruah bal lomi le kan duh lo bikmi thennak hna a chuak tawn. Cucaah kan i dawtnak a hrawnktu thil hna cu hrial hna usilaw dawt khawh chung in i daw hna usih.


3. Upat le Hmaizah Ding

Chungkhar dawt te le rem tein um hi a ho poh nih kan duh dih mi a si. A si nain Laimi cu kan ram uknak a that lo ruangah a si a faak bikmi miphun pakhat ah kan i tel ve i fimthiamnak, zatlang nun thleidannak, biaknak le ramkhel lei covo ngeih lo nak le nuhrin covo nawlbuarnak hna nih kan lungput le kan ziaza hna cu a hrawh ngaingai. Cucaah Pakhat le pakhat i upat le i hmaizahnak um lo in nawlngaihnak tu kan i cuh. Nule va karlak ah hin a biapi ngaingai mi cu kan mah lawng kan um ah siseh, hawi sin kan um tikah siseh, pakhat le khat upatnak i pek le i hmaizah hi a si. Kan nupi le kan vale cu kanmah nih kan upat hna lo i kan hmaizah hna lo ahcun midang zong nih upatnak le hmaizahnak an pe hna lo. Mi nih ka va hi, ka nupi hi upat hna seh ti kan duh ahcun kan mah hrimhrim nih kan upat hna awk a si. Biahrang in i chawnh, zawmtaihnak in i chawnh le biatha lo biaeng in i chawnh tehna hi nu le va karlak ah a um awk a si loh. Nule va cu kan thiam kawh chung le kan sikhawh chungin upatnak le hmaizahnak i pe hna usih.


4. Pathian Bia le Dawtnak In Fale Thanter Ding

Kan fale nih Pathian dawtnak an theih i an thinlung le ruahnak dihlak in Pathian dawt ding cawnpiak hi kan bible nih a kan fialmi a si. Cucaah nule pa kan rian ngan bik cu chungkhar in pumhnak, bible reltinak, thlacam tinak le chungkhar in Pathian thangthat tinak tuah lengmang hi biapi ah kan ruak awk a si. Minung thluak kong research tuahmi ahcun chuahka in kum 25 kan si tiang thluak hi a thang ti a si. Cucaah a thang cuahmah mi fale thluak ah Pathian biatak le thiltha tuah duhnak le dawtnak bia hi rawm khawh chung in rawn I zuam hna usih.


Fale caan pek le an sining tein dawt hi kap tampi an thannak ah bawmtu bik asi. Ban le ke a ngei lomi Australian American Nicholas James Vujicic nih tihnak nei lo raltha taktak in le vawleipi hngalh in biachimtu ka sinak cu ka nule ka pa nih ka sining tein an ka dawt ti ka theihnak ah hin a si a ti. Nule pa sin in fale nih dawtnak taktak an co lawng ah mah le mah i zumh ngamnak (Confidence) an ngei i midang cung zongah dawtnak le zawnruahnak lungthin an ngei kho. Cucaah fale cu zeibantuk dam lo nak, tlamtlin lo nak le buaibai nak an chuahpi zongah ruangngeilo dawtnak in kan dawt peng hna i an cungah dawtnak kan langter peng aw a si. Cutikah than tha in an thang lai i theipar tha a chuakmi fale ah an i chuah ko lai.


Biafunnak :

Bomh hal hi izahpi ding le ifahsak ding a si lo. Kanmah lawng chungkhar harnak a tongmi kan si lo tihi theih zungzal ah a tha. Minung cu a chambau mi le kap tampi in ai herh mi lawng te kan si. Zumtu kan si bantukin Nu le va kar ah, fale zohkhenhnak ah harsaknak kan ton mi hna hi a tlai tuk hlanah kan Pastor te fuh hmasa hna usih. Thla a kan campiak mi le Pathian bia in thazaang a kan pek i ruahnak a kan cheuhmi cu Pathian nih chungkhar damnak ah thluachuah a pek lai. US ram a rumnak le a thatnak lawng si lo in kan chungkhar cu thinlung ah, ruahnak ah le tuahsernak ah a rummi le a nuammi ah ser hna usih.

133 views0 comments

Recent Posts

See All

Comments


bottom of page