top of page

PASTOR AANKA (Vol. 6)

MITTHLI HE THLAICI A TUHMI NIH LUNGLOMHNAKFAPHAL AN ZUN LAI. PART -1

Khrih Jesuh nih a kan phurhmi hnangamnak le daihnak nan sinah um ko seh tiin nan kutnem kan tleih hna. Khrihfa hmaisa hna “KENEH” ka zoh tikah, fak piin keimah nun a ka bihter ve tawn. Ka hmuhning ah a fiang ko tiah ka ruah mi cu, “Zumtu hna lam hi pangpar phahmi lam si lo in hling phahmi lam asi” ti hi a si.(Matt.7:13-14).Adoniram Judson nunnak hmang in, thlalang i bih tti ding in kan sawm hna. Kawlram Baptist khrihfabu cu Amerika in an rak thlahmi Judson siangbawite nupa nih an thok mi asi. Judson te an phak hlan ah India in William Carey fapa Felix Carey le Charter an rak phan cang nain an rak i ruahning bantukin an hlawh a tling lo. Cun Felix Carey te an phak hlanpi in Roman Catholic Missinary (RCM) siangbawi an rak phan cang nain an i ruahning in an tlam a rak tling ve lo. Judson le a nupi hi India ram an rak phan hmasa nain ruah lopi in British cozah nih umnak nawl a rak pek hna lo tikah William Carey nih ruahnak a cheuh hna ning in Kawlram lei ah a rak i mer than mi hi asi.


Judson cu Kum 1788 ah Massachusetts, USA ah a chuak. Apa cu congregation khrifabu ah pastor tuan mi a rak si. Ano lio te in cathiam ngaingai mi asi. Taang 16 a rak awng. Brown University ah a kai, kum 3 chung a thiam bik mi sinak in a rak awng. Ahnu ah Pathian dawtnak a hun theih tikah Bibal Sianginn a hun kai, BD (Bachelor of Divinity) zong a thiam bik sinak in a awng than. Bibal sianginn akai lio tein, Asia ram ah mission tuan duhnak lungthin a rak ngei. Abik in Claudius Buchanan nih a tial mi “Nichuahlei Arfi” timi sermon cauk a relnak le William Carey India ram ah mission rian a tuannak nih Judson cu a lung a thawhter khun. Judson cu Nancy ti zongah an khawh mi Ann he i thitumhnak an ngei. Anupi, an hawi le Samuel, Harriet Newell le Luther Rice tiin February 12, 1812 ah Carava Tilawng in America ram Salem khua in mission rian tuan ding ah India lei ah kal an i thawh, thla 4 chung , thlichia tilet tihnung tampi lakah khual an tlawng hnu ah June 17, 1812 ah India ram Kolkata an phan. Mirang England in an rak thlah mi siangbawi asimi William Carey le a hawile nih an rak don hna. Hi lio hi America le British ral an rak I doh lio asi caah India ram nawlngeitu “East India company” nih Judson te kha India umnak nawl an pe hna i an ratnak tinbaw in nan kir than lai tiah thaawlnak nawl an pek hna. Cucaah Asia ram mission tuan khawhnak lam a um ti lo caah, meng 4000 tluk a hlatnak Afrika Kontinent Mauritius tikulh ah an kal. Cu ka hmun cu Mission riantuannak ah hmunhma rem a si lo caah a lung a dong ngaingai.


Malaysia ram Pinang khua ah mission rian tuan ding ah kal an ra duh. Tilawng a kal mi a rak um lo caah nichuah lei hoih in an kirthan i India ram in Malay lei kal mi tilawng an rak kawl, asinain cuka lei in akalmi tilawng an hmu kho loh. Ruahlo piin Kawlram kal ding Geogiana tilawng pakhat an rak um. An i ruahning in thil a kal ti lo caah an hmuh khawhmi ram poah ah kal an duh cang. Cucu Pathian lamhruainak a si ko tiah an cohlan. June 12, 1813 ah Kawlram lei kal ding an I thawh. Thliachia faktuk in a hran caah an khuallam cu lungfim loin an um. Judson nupi Ann cu fahngai in azaw i a nunnak caah thinphang ngai dirhmun tiang a phan. A dam lo tuk caah a hmasa bik nau a pawi mi a fate zong a thi i aruak in achuak. Khuazei hmanh ah dornak le dinhnak an hmuh loh. July 13, 1813 ah Rangoon khua an phan. Kawlram hi an mission field caah an rak thim mi asi lo nain Pathian nih a rak thim piak mi hna hmun asi.


Pathian riantuantu hna lamhluan hi pangpar phahmi lam zulh siloin hling le so in phah mi lam, zawhtu hi a si deuh. Kawlram an phakhnu, Pathian rian zeitluk in dah kan tuan khawh lai an ti lio caan ah, an fa pa Roger nih a thihtah hna. An lung a fak tuk ko nain Bawipa riantuan awkah an rian a tam tuk caah ngaihchiat caan hmanh ngei thiam loin Pathian rian cu an tuan chih peng ko. Kum 1822 ah Judson cu tihnung zawtnak ngal-eu nih a phak ve. Cun an nu Ann Judson zong, thin lei zawtnak a ngeih mi a zual chin lengmang ve hoi. An pahnih in India ram ah an i thlop. Judson cu a hung dam deuh i Rangoon ah riantuan than ding in a kir than. Asinain a nupi cu England ah i thlop ding in a lan, a dam khawh hlei lo caah an umnak Amerika ram ah a lan than i cuka ah cun aa thlop. A dam thiang rih lo nain Kawlram an rian tuannak kha a sia a herh tuk caah June 21,1823 ah kawlram mission rian tuan than ding in akal than, December 5,1823 ah Rangoon a phan than. 1824 ah British le Kawlram avoi khatnak raltuknak a thawh caah Ava khua siangpahrang zungah Judson le Dr. Price cu British sin ah Amerikan siangbawi pawl an lahkhah cu an rak pek hna. Cucaah kawl cozah nih siangbawi hna hi ngiathlaitu(spy) ah an hman hna tiah an ruah hna caah Judson le Dr. Price cu thong an thlak hna i, misual thah ding mi pawl an chiahnak hmun ah an chiah ve hna.


Judson nupi Ann nih Judson le Dr. Price luat khawhnak ding ah a phunphun in aa zuam. Asinain British ral a dih hlan cu Judson te thlah awk ah a hohmanh nih siangpahrang kha an chim ngam lo. Thong ukbawi kha an len nain, a mah nih luat ternak nawl a ngeih lo caah hremlo tuin tha tein a mah tu nih a zoh khenh hna.Thong an tlak hlan ah khan, Ann cu nau a pawi i a fa pawi he uktu bawi le upa hna cu a va ton lengmang hna. An pa le Dr.Price thong an tlak kar ah Ann cu fanu te Maria a rak ngei. Fanu mithmai thar a hmuh tikah aa lawm ko nain, an thongtlaknak nih an lunglomhnak a tlinter kho hna lo. Caan tawmpal hnu ah Ann cu a zawtnak a chuak than i a zual ngaingai, a fa nu sung Maria zong a zoh khenh kho ti loh. Judson te chungkhar hi khuacimui taktak in an um. An riantuan hawi hna nih dawtnak taktak in Judson te chungkhar cu an rak zuanhnawh hna.

Judson le Dr. Price cu Pathian nih a um pi hna i kawl cozah nih an nunnak taktak cu an la hna loh. Ral a dih tikah raldaihnak sachoke (Yandabo Sachok) tuah an duh i mirang holh le kawlholh a thiammi Judson cu holhlettu ah an herh caah thong chung in an chuah. Cun Judson bawmtu ding ah Dr.Price zong an chuah ve. Judson le Dr. Price hna cu kumkhat le thla 7 thong an tlak hnuah an chuah than hna hi asi. Thihnak thong chung in a kan luattertu hi Pathian a si ti an fian caah lunglomhnak in an khat. September 30,1826 ah Judson cu khrihfa mi hna nih luat te in thawngtha chim khawhnak nawl a um kho hnga maw, tiah a nu pi Ann le a fa nu Maria kaltak in AVA khua ah uktu bawi pawl tong ding ah a kal. Asinain a ruahning bantuk in thil akal loh, a kal hnawhchan mi cu a tlamtling lo. Aruang cu biaknak zalonnak kong zeihmanh British he sachoh kan tuah mi aum loh. Cun kawl pawl nih mirang poahpoah an rak huat hna, cu huatnak zong ai tel. Cun Judson hi mirang lei tang asi tiin an rak puhbel mi ruang zong a tel.


Nikhat cu Kyaihkhami Palik bawi sinin cabawm Judson sin ah a phan. Cu cabawm cu a van kau tik ah “Na dawi tukmi na nupi Ann nih October 24, 1826 ni ah, hi vawlei harnak in Pathian sin ah ai din cang” timi cakuat arak si diam! Ahohmanh an phak rih lonak Kawlram, a harnak vialte a in pitu, a bawmtu le a dawt bik mi a nupi nih hmundang aum karah arak thih tak tik ah, Judson cu a hrut lai bantuk in aum. Ann siangbawinu nih a thih lai te ah a chim tak mi hna cu, “Saya pa hi zeicaahdah inn a phak bel hnga lo ee? Kei cu ka fanu ka kal tak lai i ka thi cang lai. Pathian nawl asi caah ka ruah thiam ko. Saya pa ka chimh piak u, ka zawtnak hi a fak tuk caah ka nunnak nih atuar in atuar kho ti lo ee, zei tluk in dah ka tuar ti hi nan ka hmuh ning tein a dihlak in rak chim te u, cun kan thilri aum mi te le, kan fanu dawt Maria hi a pa a phak hlan tiang tha tein rak ka zohkhenh piak hram uh! tiah kan nawl hna,” a ti i cuti cun a nunnak a liam ruangmang. Va le um lo lio le chungkhat pakhat hmanh um lonak hmun i thih cu siangbawinu caah a fak hringhran ko. Siangbawi pa Judson cu a nupi a thih lio i a sin te ah aum khawh lomi ruang ah hin, a mah le a mah ai ngai thiam kho lo i acelh in acel ve hrim loh! Judson nupi Ann a hun thih hnu caan tlawmpal a rauh hnu ah, afa nu dawt Maria kum 2 le thla 3 nih ruah lo piin apa Judson cu a hun thih tak ve than. Judson hi tinbaw cung ah a ruak in a fa a chuak,aphak ka ah afa nih athih tak hoi, anupi nih athihtak, atu afanu nih a hun thihtak than tikah atuar in atuar kho hrimhrim loh. Sihmanhsehlaw cutluk i lungrawk le lungfak in a um lio caan ah hi tihin ai hnem. “Ngaihchiatnak chummui chungah ka um lio

zongah Pathian nih a ka um pi ko, a mah cu ka zumh, a mah bel ka hmu lo” ati. Cuticun Bawipa ah thazaangthar a la i a van I hrim than. Kum 1834 ah Tavoya tlang i riantuantu pakhat, Rev. Boarman nih a thihtak mi Mrs. Saran he an I tong. Rev. Francis Mason nih kutsih thlacamnak a tuah piak hna i cu ticun nupi dang a hun ngei than. Kum 10 chungah fa 7 Pathian nih a pek hna. 1845 ah Judson nih a nupi Sarah le an fa le upa deuh pathum cu Amerika ram kal ding in a thawh pi hna. Tilawng in an kal i a nupi Sarah cu a dam lo i, lampi ah a zualtuk caah Aug.26, 1845 ah a nunnak a liam ve. Aruak cu America ah kalpi awk a that lo caah St.Helena tikulh ah an vui. Siangbawi Judson tuanbia hi ngaih achia hringhran ko. Judson cu kum 33 renglo Amerika a hmuh lonak a si i, Amerika cu arak i thleng tuk cang. Akenkip in thawngtha chim an sawm, mission riantuannak kong kan chim seh tiah an sawm, Kawlram i mission an tuanninak, a thut toning, an thihlohnak kong, an harsatnak le an tuarnak kong kha tampi in kan chim te lai tiah an i ruah nain pakhat hmanh cu kong achim loh! Khrih teminnnak le akan dawtnak thawngthabia lawng a chimh hna. Cu vialte a chim duh lomi cu a mah le mah i cawisannak, i thangthatnak asi sual lai ti a phang. Cun kan riantuannak le ka teminnak hna hi, Khrih teminnak he tahchunh ah cun a chim in chimtlak lo asi, tahchunhtlak lo asi ee ati. Cubantuk a nunnak le a thinlung put nih mipi cu an nun a khoih dih hna. Kawlram mission kan tuannak ah hin, thla fak piin kan cam piak peng ko u, tihi bia a cahmi hna cu asi. Arian tuannak, a thawngtha chim le a nun nih mi thinlung a khawih dih caah Mission Board leiba $40,000.00 an ngeihmi zong, thawhlawm an pek mi in an cham khawh dih pin ah hmailei mission riantuannak ca zong ah ah thil tampi thathnemnak apek hna. Kawlram lei mission riantuannak ah, bawmtu um loin asi khawh lo caah, nupi thit ding in an timhtuah piak i Emily Chuckkock he thitumh kutsihnak an tuah piak hna. Nupi athit hnu in kawlram lei ah an kir than. Asinain an kal takmi an fa le 3 hna lak ah, Charlesan ti mi pa nih an umlo kar ah arak thihtak diam hna. Cuti cun a tangmi pahnih te cu Emily nih tha tein a zoh khenh hna. Judson cu ruah lo piin damlonak nih a vun phak i, a zawtnak cu a zual chin lengmang caah a dirhmanh a dir kho ti lo. Azawtnak a zual tuk cang caah Amerika lei sizung lei i thlop ding ah kal ding in an timhtuah.


Anupi Emily cu pumlawng loin a um lio asi caah, an pa cu a zul kho lo. Judson cu midang a mah zohkhenhtu ding fialmi hna he lungsiaherh ngai in Amerika lei i thlop ding in tinbaw in an I thawh. Rangon an I thawhnak in, ni 4 a rauh hnu April 12, 1850 @ 4:15 PM lampi ah a nunnak a dih ruangmang ve. Cu ti cun Bengal Rili cungah a ruak cu vui asi. Kha caan lio cu thawng i thanhnak a har tuk caah a nupi thawng an thanh mi zong fawi tein a sin aphan kho loh. Judson a thih in thla 4 hnu lawngah a nupi le a chungkhar nih an pa Judson siangbawipa athih timi thawng cu an rak theih. Siangbawi Judson a thaisung nu Emily cu anpa a thih thawng a theihnak in, ni 10 hnu ah a paw chung ummi a nau te a rawk, amah hrimhrim zong fak ngai in azaw.1851 January thla ah a fanu te le anupi thing Sarah nih a rohtakmi hna pahnih hna he ngaihchia lungkuai ngai

in Amerika ah an rak kir. Emily zong a zawtnak in a dam khawh hlei lo caah kum 36 asi ah anunnak a liam ve. Siangbawi Judson tuanbia le teminnak hna hi minung sinak in ruah ah cun, tuarawk a tha loh, atemtuarnak hi atuak in tuak khawh ding asi loh. Asinain an temtuarnak vialte cu Pathian nih a theih i, a mah sunparnak caah a hman i, Kawlram chungah thlarau tlau mi a sangsang, a singsing nih khamhnak thawngtha kan hun theihkhawhnak cu an rak temtuarnak ruang ah hin a hun si. Pathian nih nan ruahning le ka ruahning cu aa khat lo, ati mi a tlinnak asi caah Pathian min thangthat si ko seh.



JUDSON A THIH AH KAWLRAM KHRIHFA CAZIN

Judson Siangbawipa a nun chungah rian tampi a tuan, a thih tikah Pathian Judson hmang in Kawlram khrifa cu hramfek ngaiin a bunh.



JUSON BIARORIAK:

  1. Keimah kong chim ding ka ngei lo. Phawrhlawt ding, conglawmh ding, upatnak pek ding ah ka hme tuk.

  2. Pathian khamhnak le dawtnak kong chim hi ka rian asi.



  • Chirhchan laknak: Baptist tuanbia le zumhnak timi cauk, Rev.Dr.Sang Awr nih tialmi chung in chirhchan ka lak mi asi.

  • Catialtu : Rev.Ram Maung

13 views0 comments

Recent Posts

See All

Comments


bottom of page